Nýliðaþjálfun Hjálparsveitar Skáta í Garðabæ

Hvað felst í nýliðaþjálfuninni?

Markmið nýliðaþjálfunarinnar er að búa nýliða undir að taka virkan þátt í störfum björgunarsveitar. Helstu atriði þjálfunarinnar eru:

• Að fara yfir ferðamennsku við íslenskar aðstæður, búnað fatnað og fleira.
• Að kenna nýliðum fyrstu hjálp í óbyggðum.
• Að þjálfa nýliða í þeirri tækni og aðferðum sem við notum, t.a.m. við leit eða fjallabjörgun.
• Að aðstoða nýliða við að verða hluta af hópnum sem HSG er.

Með þátttöku í nýliðaþjálfun öðlast þú næga þekkingu og reynslu til að geta tekið þátt í helstu björgunaraðgerðum. Þjálfunin er frekar ströng og getur reynt á, bæði andlega sem og líkamlega en er engu að síður bæði gagnleg og skemmtileg.

Hverjir geta tekið þátt?

Allir sem hafa áhuga á að taka þátt í björgunarstörfum og eru tilbúnir að gefa sér tíma til að mæta á æfingar og námskeið. Nýliðar þurfa að lágmarki að verða 18 ára árið 2025 og hafa gott vald á íslenskri tungu. Annars er áhugi allt sem þarf.

Af hverju að starfa í björgunarsveit?

Fólk hefur mismunandi ástæður fyrir því að starfa í björgunarsveit. Flestir eiga það þó sammerkt að vera að leita í góðan félagsskap fólks sem hefur svipuð áhugamál auk áhuga á leitar- og björgunarstörfum.

Hvernig er dagskráin?

Nýliðar hittast öll þriðjudagskvöld yfir vetrartímann. Haldnir eru fundir eða farið í styttri ferðir. Yfirleitt byrja fundirnir klukkan 19 og miðum við við að klára ekki seinna en 22. Á þriðjudagskvöldum eru styttri námskeið, alls kyns æfingar og léttar göngur. Jafnframt er einhver dagskrá aðra hverja helgi. Er þá um að ræða stærri námskeið eða lengri ferðir. Helgardagskrána má sjá hér að neðan.

Hvernig skrái ég mig?

Við héldum kynningu á nýliðastarfinu okkar þann 26. ágúst í Jötunheimum, Bæjarbraut 7 í Garðabæ. Ef þú vilt skrá þig fyrir fyrsta fund þá er skráningareyðublað hér.